ដោយៈសុខុម
ស្ទឹងត្រែង៖ សមត្ថកិច្ចប្រចាំការច្រកទ្វារព្រំដែនអន្តរជាតិត្រពាំងក្រៀលខេត្តស្ទឹងត្រែងនៅព្រឹកថ្ងៃទី០៤ ខែកញ្ញា ឆ្នាំ២០២៤បានឆែករកឃើញថ្នាំញៀនជាច្រើនបង្កប់នៅក្នុងរថយន្តដឹកអ្នកដំណើរ ពីប្រទេសឡាវមកកម្ពុជា។
ប្រភពពីសមត្ថកិច្ចបានឱ្យដឹងថាមន្ត្រីនគរបាលអន្តោប្រវេសន៍ នៃប៉ុស្តិ៍គរបាលច្រកទ្វារព្រំដែនអន្តរជាតិត្រពាំងក្រៀល បានធ្វើការត្រួតពិនិត្យឆែកឆេរលើរថយន្តដឹកអ្នកដំណើរពីប្រទេសឡាវ មកប្រទេសកម្ពុជា ១គ្រឿង តាមច្រកទ្វារព្រំដែនអន្តរជាតិត្រពាំងក្រៀល ខេត្តស្ទឹងត្រែង។ភ្លាមនោះបានរកឃើញម្សៅក្រាមពណ៌សថ្លា និងថ្នាំគ្រាប់មួយចំនួនដាក់ក្រោមកៅអីអង្គុយខាងក្រោយ។នៅពេលរកឃើញមានថ្នាំញៀនសមត្ថកិច្ចក៏បានធ្វើការសួរនាំនិងឃាត់ខ្លួនជនជាតិវៀតណាមចំនួន២នាក់។
មន្ត្រីនគរបាលអន្តោប្រវេសន៍ បានឲ្យដឹងថា រថយន្តដឹកអ្នកដំណើរពីប្រទេសឡាវមកកម្ពុជាដែលជនសង្ស័យធ្វើដំណើរជាប្រភេទរថយន្តក្រុង ៤៥កៅអី) ពាក់ស្លាកលេខឡាវ 7979 ។ ភស្តុតាងបានរកឃើញម្សៅក្រាមពណ៌សថ្លា និងថ្នាំគ្រាប់មួយចំនួន ដាក់ក្រោមកៅអីអង្គុយខាងក្រោយ រួមមាន ២៧ដុំធំ ជាប្រភេទក្រាមពណ៌សថ្លា សង្ស័យជាសារធាតុញៀន និងប្រភេទថ្នាំគ្រាប់ពណ៌បៃតង (សង្ស័យជាប្រភេទថ្នាំគ្រវី), ១០ដុំធំ ជាប្រភេទម្សៅ សង្ស័យជាសារធាតុញៀនប្រភេទហេរ៉ូអ៊ីន, គ្រាប់ក្រហមតូចៗ ៤៦៥គ្រាប់ សង្ស័យជាសារធាតុញៀនប្រភេទថ្នាំយ៉ាម៉ា និងក្រាមពណ៌សថ្លា ១កញ្ចប់តូច។
ក្រោយពីមានការសង្ស័យប៉ុស្តិ៍នគរបាលច្រកទ្វារបានសុំកិច្ចសការជាមួយកម្លាំងសមត្ថកិច្ចការិយាល័យទំនាក់ទំនងព្រំដែន (BLO) និងសមត្ថកិច្ចមូលដ្ឋានដែលពាក់ព័ន្ធ ដើម្បីសហការត្រួតពិនិត្យបន្ថែម និងបានបញ្ជូនបន្តទៅឲ្យស្នងការដ្ឋាននគរបាលខេត្តស្ទឹងត្រែង អនុវត្តនីតិវិធីបន្ត៕
